Lansiad Tu Chwith ym Mhenlan Fawr, Pwllheli!
31.03.13
‘Mae yna rai yn ein plith sydd ddim ar y dde, ond ar y chwith.’ Bob Delyn
Diolch i Bob Delyn a’r Ebillion am gael rhannu’r llwyfan a diolch i dafarn Penlan, Pwllheli am y croeso cynnes. Diolch hefyd i bawb a ddaeth i gefnogi dydd Sul.
Bob Delyn a’r Ebillion
Penlan Fawr, Pwllheli
Dathlu lansiad rhifyn 38
Dathlwyd lansiad cyfrol 38 yn ystod gig Bob Delyn a’r Ebillion yn nhafarn Penlan Fawr, Pwllheli dydd Sul 31.03.13. Cafwyd cyflwyniad i waith a syniadau’r cylchgrawn gan Elin Angharad gyda chyflwyniad doniol a difrif gan Llŷr Titus ac Elis Dafydd. Diolch yn fawr iawn i bawb a ddaeth i gefnogi!
Mynnwch gopi
Mae’r gyfrol ddiweddaraf yn 160 o dudalennau am £5 y copi ac ar gael mewn siopau llyfrau lleol neu trwy gysylltu â tu chwith ar Facebook, Twitter neu e-bost: tuchwith@googlemail.com.
E-rifynnau
Os am gopi digidol o’r rhifyn diweddaraf, ewch i ymweld â: www.tuchwith.com/e-rifynnau/
Lansiad #digidol38
Lansiad #38
31.03.13
Tafarn Penlan Fawr, Pwllheli
i ddechrau oddeutu 4:00yh yn ystod gig Bob Delyn a’r Ebillion
Yn dilyn llwyddiant lansiad ‘Gwreiddiau’ #36 yn Nhafarn Penlan y llynedd, rydym yn falch iawn o gael dychwelyd eto eleni ar gyfer lansiad #38, ‘digidol’.
Mae croeso cynnes iawn i bawb ymuno â chriw tu chwith ar gyfer lansiad #38 yn awyrgylch ffantastig Penlan Fawr! Bydd cerddoriaeth fyw gan Bob Delyn a’r Ebillion a chyfle i brynu copi o’r cylchgrawn, cyn iddo gyrraedd y siopa’!
Edrychwn ymlaen am eich cwmni.
http://tuchwith.com/wp-admin/post.php?post=879&action=edit
Tu Chwith 2013
Annwyl Duchwithwyr!
Bydd rhifyn #38 o gylchgrawn Tu Chwith, ar y thema ‘Digidol’ yn cael ei gyhoeddi fis Ebrill eleni. Bydd y rhifyn hwn yn trafod datblygiadau digidol, boed hynny ym myd e-newyddiaduraeth, gemau cyfrifiadurol, celf a llenyddiaeth. Bydd y rhifyn yn camu i fyd y blogio, trydar ac i oes bell, bell yn ôl pan ddaeth y cyfrifiadur i ddisodli’r cwilsyn. Bydd gennym eitem ar Ŵyl Gelf Ddigidol Blinc, sy’n cael ei chynnal yn flynyddol yng Nghonwy, lle mae nifer o artistiaid yn cael eu comisiynu i drawsnewid y dref yn oriel gelf ryngweithiol. Dyma ŵyl sydd gwironeddol werth ymweld â hi.
Rydym yn falch iawn o gyhoeddi y bydd golygydd gwadd ar gyfer y rhifyn dilynol, sef Llŷr Gwyn Lewis. Mae Llŷr yn fyfyriwr ôl-radd ym Mhrifysgol, Caerdydd ac yn gobeithio cwblhau ei draethawd doethurol eleni. Ei thema ar gyfer rhifyn #39, rhifyn yr Eisteddfod, yw’r ‘Eisteddfod’. Yn dilyn sefydlu tasglu o ddeuddeg y llynedd i drafod dyfodol y brifwyl, gobaith Llŷr ar gyfer y rhifyn hwn yw casglu ‘gwahanol ymatebion a dehongliadau gan ddarparu llais amgen ynghylch yr Eisteddfod gan y rhai sydd wedi cyfranogi’n uniongyrchol ohoni ac a fydd yn cyfrannu ati am flynyddoedd i ddod.’ Bydd y rhifyn yn cael ei gyhoeddi fis union cyn i’r tasglu adrodd eu canfyddiadau i’r Gweinidog Addysg a Sgiliau, Leighton Andrews ym mis Medi 2013. Mae Llŷr hefyd yn awyddus i gynnwys gweithiau creadigol ar ffurf barddoniaeth, rhyddiaith a chelf, a fydd yn ymateb yn uniongyrchol neu’n anuniongyrchol i’r thema.
Os hoffech gyfrannu i rifyn #39, mae croeso i chi gysylltu â Llŷr i drafod eich syniadau ymhellach. Mae modd cysylltu gyda Llŷr yn uniongyrchol: llyrgwyn@gmail.com neu anfon neges i gyfeiriad e-bost y cylchgrawn: tuchwith@googlemail.com
#digidol38 #eisteddfod39
I Benlan – Guto Dafydd
I Benlan
Dewch i’r Gymru rydd ar b’nawn dydd Sul,
Yn eich siorts mawr llac, yn eich siwtiau cul.
Dewch i neuadd fu yma ers pan
ddôi llawnder y llanw at odrau Penlan.
Dydi’r nos ddim yn brathu: pan fydd farw’r dydd
bydd y muriau’n lloches i Gymry rhydd.
Chwilio am uchelwyr, a chael bod pawb yn un:
y lleiaf ohonom yn llinach arglywddi Llŷn.
Treuliwn oriau gwallgo rhwng y waliau gwyn:
wnaiff daergrynfeydd ddim ysgwydd fan hyn.
Gwres tân Glyndŵr i’w deimlo ‘Mhentre Poeth:
wedi llosgi’r eithin mae’r tir yn noeth
ac mae digon o le i ni godi’n tai
efo cerrig yr Imbyll (pedwar llawr, a dim llai).
Mentrodd dynion wthio’r môr yn ei ôl,
gwneud mur er mwyn ennill daear a dôl;
gwneud gwestai, a phyllau a phromenâd,
gwneud pwyllgor, tram, marchnad, plaid i godi gwlad.
Rydan ni yma’n ffeirio geiriau ffôl
am fod gwŷr a’u gweision, ganrifoedd yn ôl,
’di rhoi carreg ar garreg, cydio stryd wrth stryd yn dre –
gweld cyfle, gweld cartref, ac adeiladu’r lle.
Gwneud llongau: mynd â cherrig a hogiau i’r byd,
i Baris a Llundain, a dychwelyd mewn pryd
i gael cwrw a choelcerth ar y Groes neu’n Ben Garn.
A down ninnau i’r dre, i ddawnsio, i bledu barn
yn hyf ar ein gilydd. Mae’r neuadd yn wen,
yn olau, yn eang: ddaw’r nos byth i ben.
A chyn bore fory, pan ddifarwn ni’r dydd,
cawn setlo mewn darn bach o’r Gymru rydd.
Guto Dafydd