Pen Talar: Rhagolygiad #pethaubychain
Pen Talar
Rhagolygiad
Bydd y gyfres hir-ddisgwyliedig Pen Talar yn ymddangos ar ffurf naw pennod gan ddechrau ar Fedi’r 12fed ar S4C. Hir ddisgwyliedig am sawl rheswm ond yn bennaf oherwydd does dim byd yn mynd i gyffroi cynulleidfa S4C yn fwy na drama dda sy’n mynd i’r afael â hanes y mudiad cenedlaethol yn ystod yr hanner canrif diwethaf: fersiwn Cymru o ‘Our Friends from the North’. Drama yw rhagoriaeth S4C felly ni allai’r amseru fod yn well ar gyfer drama a allai ail-danio boliau’r gynulleidfa dros y sianel. Gallai’r ddrama hon grisialu popeth yr hoffai sylfaenwyr y sianel Gymraeg fod wedi breuddwydio amdano yn y lle cyntaf: cyfryngau creadigol sy’n codi cwestiynau ac adlewyrchu pwy ydym ni. A phwy all dynnu eu llygaid oddi ar olwg ac actio ysblennydd Richard Harrington a Ryland Teifi!
‘Nid diffinio rydym ni’n ei wneud, ond dehongli’ meddai Ed Thomas, cyd-awdur Sion Eirian, mewn dangosiad o’r bennod gyntaf yr wythnos ddiwethaf. Bydd eu dehongliad nhw o hanes y mudiad cenedlaethol yn wahanol fel y mae’n wahanol i bob unigolyn, heb amheuaeth. Y gobeith felly yw y bydd trafodaeth gwirioneddol yn tyfu wrth i’r gyfres fynd rhagddi – am y tir canol yn y dehongliadau, am y gwahaniaethau, y llwyddiannau a’r methiannau, am daith y gwerthoedd gwreiddiol i’r cwestiwn beth ydyn nhw heddiw. Taith unigolion yn ymyrryd â thynged cenedl a’r genedl honno’n ymyrryd ag unigolion yw addewid y gyfres, a dywed S4C ar eu gwefan: ‘yn stori am baradwys coll, i eraill, stori o obaith am baradwys wedi ei adennill. Yn sicr, mae hon yn ddrama daer, gref a fydd yn ysgogi atgofion a breuddwydion cenedl gyfan.’ … Continue Reading
Tu Chwith yng Ngŵyl y Dyn Gwyrdd 2010
Diolch i bawb am ddod i’r digwyddiad Tu Chwith yn y pabell lenyddiaeth yng Ngŵyl y Dyn Gwyrdd 2010.
Cafwyd set gan Mr Huw, darlleniadau o’r gyfrol newydd ‘Croesi Ffiniau‘ a gêm i’r gynulleidfa, sef sgwennu geiriau am yr ŵyl i alaw gan Mr Huw.
Dyma rai o’r uchafbwyntiau a ffilmiwyd:
Mr Huw a chaneuon newydd o’i albwm arfaethedig, Creaduriaed Od.
Adolygiad: The Beach (Cynhyrchiad National Theatre Wales).
The Beach
National Theatre for Wales
Prestatyn
27ain mis Awst 2010
Nid oedd gennyf syniad beth i’w ddisgwyl yng nghynyrchiad diweddaraf y National Theatre Wales a ddisgrifwyd fel ‘outdoor gaming on the beach at Prestatyn.’ Roedd y gorchymyn ‘come and join us’ hefyd yn awgrymu rhyw elfen o weithred gan y gynulleidfa, ac fel un sydd yn mwynhau ymlacio mewn cadair foethus yn y theatr i fwynhau’r arlwy ar y llwyfan, nid oeddwn yn siŵr a oedd cymryd rhan mewn rhyw syrcas awyr-agored yn mynd i fod at fy nant. O ddeall fod y gynulleidfa’n rhan o’r perfformiad byw, roeddwn felly’n teimlo’n nerfus fel aelod o’r cast! Roedd y gair ‘gemau’ hefyd yn awgrymu mai adloniant ysgafn heb unrhyw ystyr yn perthyn iddo a oedd yn fy nisgwyl. Ond fe’m siomwyd ar yr ochr orau. … Continue Reading
Rhifyn 33 Tu Chwith AR WERTH NAWR!
Mae rhifyn 33 o tu chwith ar werth nawr!
Prynwch yn eich siop leol neu tanysgrifiwch (cynnig arbennig am wythnos yr Eisteddfod)
Ar faes yr Eisteddfod, gallwch ei brynu ar stonin y Cyngor Llyfrau, stondinau siopau Cymraeg neu stondin Cymdeithas yr Iaith Gymraeg.
Y thema yw Croesi Ffiniau ac mae’r rhifyn wedi ei olygu gan Menna Machreth a ceri Elen. … Continue Reading
Cyfle gwych i gyfieithwyr: Her Gyfieithu Tŷ Cyfieithu Cymru – Oxfam Cymru 2010
Her Gyfieithu – O’r Ffrangeg i’r Gymraeg neu Saesneg
Mae Tŷ Cyfieithu Cymru ac Oxfam Cymru yn cynnal her gyfieithu ac mae’r wobr yn gyfle gwych i unrhyw gyfieithydd llenyddol.
Yr her eleni ydi cyfieithu rhan o’r stori fer, La folie était venue avec la pluie gan yr awdur o Haiti Yanick Lahens o’r Ffrangeg gwreiddiol i’r Gymraeg neu’r Saesneg.
Mae’r darn i’w gyfiethu yn ogystal a dolen at y stori fer yn ei chyfanrwydd ar ein gwefan:
http://www.cyfnewidfalen.org/features.cfm?lan=w&switch=dsp&feature_id=280&featuretype=1
Dyddiad cau’r gystadleuaeth yw hanner nos ar yr 16eg o Orffennaf 2010 a’r beirniad yw Patrick McGuiness a Gareth Miles.
Y wobr yw comisiwn i gyfieithu’r stori fer yn ei chyfanrwydd, dwy noson yn Nhŷ Newydd – Tŷ Cyfieithu Cymru (i’w drefnu gyda Thŷ Newydd) a Ffon Farddol 2010.
Dylid anfon eich cynigion at Dr Sioned Puw Rowlands, sioned@cyfnewidfalen.org
neu
Her Gyfieithu 2010,
Cyfnewidfa Lên Cymru,
Sefydliad Mercator ar Gyfer Cyfryngau, Ieithoedd a Diwylliant,
Prifysgol Cymru Aberystwyth,
Campws Llanbadarn,
Aberystwyth,
Ceredigion,
SY23 3AS.
Cyhoeddir enw’r enillydd ar faes Eisteddfod Genedlaethol Blaenau Gwent a Blaenau’r Cymoedd am 11:00yb, Ddydd Iau, 5 Awst 2010 ar stondin Prifysgol Aberystwyth.
Mae Tŷ Cyfieithu Cymru yn fenter ar y cyd rhwng Cyfnewidfa Lên Cymru a Thŷ Newydd, mewn cydweithrediad â Llenyddiaeth ar Draws Ffiniau, HALMA a’r Academi.
Am fwy o wybodaeth ewch i www.cyfnewidfalen.org